Lorenso Insinye «Peskara»ga qaytdi va u yerda o‘zini ko‘rsatmoqda. «Napoli»ning sobiq sardori Italiya B Seriya bahslarida mart oyining eng yaxshi futbolchisi deb topildi. Jamoa mart oyida o‘tkazilgan uchta o‘yinda g‘alaba qozondi, Lorenso esa ushbu bahslarda uchta gol urishga muvaffaq bo‘ldi.
Qo‘lga kiritilgan ikkita g‘alaba yirik hisobda qayd etildi, jumladan, «Bari» ustidan 4:0 hisobida zafar quchildi. Endilikda «baliqchilar»ning Italiya futbol tizimidagi ikkinchi divizionda o‘z o‘rnini saqlab qolish imkoniyatlari sezilarli darajada oshdi.
Eslatib o‘tamiz, Insinye 2021 yilda Italiya terma jamoasi safida Yevropa chempioni bo‘lgan edi. 2022 yilda u «Napoli»ni tark etib, bir necha yil davomida Kanada chempionatida «Toronto» sharafini himoya qildi. O‘tgan yili shartnoma muddati yakunlangach, Lorenso qadrdon jamoasiga qaytdi.
