Londonning «Arsenal» klubi hujumchisi Gabriel Jezus bo‘lajak Jahon chempionatida Braziliya terma jamoasi tarkibidan joy olish umidini hali uzgani yo‘q.
«To‘pchilar» hujumchisining mundialda ishtirok etish imkoniyatlari past baholanmoqda, chunki u tez-tez jarohat oladi va klubda muntazam o‘yin amaliyotiga ega emas. Shunga qaramay, futbolchining o‘zi Karlo Anchelotti unga murojaat qilishi mumkinligiga ishonmoqda.
«Men klubda kam o‘ynadim, bu esa vaziyatni jiddiy ravishda qiyinlashtiradi, chunki muntazam maydonga tushib, gol urayotgan boshqa futbolchilar juda ko‘p. Ammo men o‘zimga va qobiliyatlarimga ishonaman. Oxirigacha umid qilaman. Mendan ko‘ra ko‘proq imkoniyatga ega nomzodlar borligini bilaman, lekin zarurat tug‘ilganda, menimcha, mening ismim ham ro‘yxatda bo‘ladi», — dedi Jezus Globo Esporte nashriga bergan intervyusida.
Eslatib o‘tamiz, Braziliya terma jamoasi JCH-2026 guruh bosqichida Marokash, Gaiti va Shotlandiya terma jamoalari bilan kuch sinashadi.
