So‘nggi vaqtlarda mashhur insayderlar va Italiyaning yetakchi ommaviy axborot vositalari «Liverpul» darvozaboni Alisson Beker hamda «Yuventus» o‘rtasidagi ehtimoliy muzokaralarni faol muhokama qilishmoqda.

APL doirasidagi «Kristal Pelas»ga qarshi o‘yin oldidan o‘tkazilgan matbuot anjumanida «Liverpul» bosh murabbiyi Arne Slot bu borada o‘z fikrini bildirdi.

«Men bor e’tiborimni faqat yaqin istiqbolga — uni imkon qadar tezroq darvozaga qaytarishga qaratganman. U haqidagi, men va boshqalar haqidagi bu gap-so‘zlar... Biz bu yerda mish-mishlarni ko‘rib chiqmaymiz. Biz faktlarga faqat zarurat tug‘ilgandagina chuqur yondashamiz, hozir esa bunga ehtiyoj yo‘q», — deya Slotning so‘zlarini keltirmoqda Ben Jeykobs.

Alissonning amaldagi shartnomasi 2027 yilning yozida yakuniga yetadi. U jamoaga kelgan ilk kunlaridanoq «Liverpul»ning asosiy figuralaridan biri bo‘lib kelmoqda. Joriy mavsumda 33 yoshli braziliyalik posbon 34 ta o‘yinda maydonga tushdi (shulardan 13 tasida darvozasi daxlsizligini saqlab qoldi) va o‘z darvozasidan 36 ta to‘p olib chiqdi.