Braziliyaning «Santos» klubi hujumchisi Neymar jamoaning so‘nggi mashg‘ulotlarida ishtirok etmadi. Bu haqda ESPN Brasil nashri xabar bermoqda.
Rejaga ko‘ra, chempionat doirasidagi «Bayya»ga qarshi bahsda maydonga tushmagan futbolchilar yakshanba kuni mashg‘ulot o‘tkazishlari lozim edi. Biroq 34 yoshli hujumchi belgilangan vaqtda mashg‘ulotlar bazasida ko‘rinish bermagan. Hozircha yulduz futbolchining nima sababdan kelmagani noma’lum bo‘lib qolmoqda. Klub rahbariyati vaziyatga oydinlik kiritish maqsadida futbolchi va uning vakillari bilan bog‘lanishga harakat qilmoqda.
Ta’kidlanishicha, keyingi paytlarda Neymar va «Santos» o‘rtasidagi munosabatlar sovuqlashgan. Yaqinda bo‘lib o‘tgan o‘yinlardan birida muxlislar futbolchini hushtaklar bilan kutib olishgan, Neymar esa bunga keskin va asabiy tarzda munosabat bildirgan edi.
Bundan tashqari, OAVda «Barselona» va «PSJ» sobiq yulduzining xatti-harakatlaridan ayrim jamoadoshlari ham norozi ekani haqida xabarlar tarqalmoqda. Ushbu voqealar fonida futbolchining mashg‘ulotga kelmagani klubdagi ichki muhitni yanada murakkablashtirishi mumkin.
