Бразилиянинг «Сантос» клуби ҳужумчиси Неймар жамоанинг сўнгги машғулотларида иштирок этмади. Бу ҳақда ESPN Brasil нашри хабар бермоқда.
Режага кўра, чемпионат доирасидаги «Байя»га қарши баҳсда майдонга тушмаган футболчилар якшанба куни машғулот ўтказишлари лозим эди. Бироқ 34 ёшли ҳужумчи белгиланган вақтда машғулотлар базасида кўриниш бермаган. Ҳозирча юлдуз футболчининг нима сабабдан келмагани номаълум бўлиб қолмоқда. Клуб раҳбарияти вазиятга ойдинлик киритиш мақсадида футболчи ва унинг вакиллари билан боғланишга ҳаракат қилмоқда.
Таъкидланишича, кейинги пайтларда Неймар ва «Сантос» ўртасидаги муносабатлар совуқлашган. Яқинда бўлиб ўтган ўйинлардан бирида мухлислар футболчини ҳуштаклар билан кутиб олишган, Неймар эса бунга кескин ва асабий тарзда муносабат билдирган эди.
Бундан ташқари, ОАВда «Барселона» ва «ПСЖ» собиқ юлдузининг хатти-ҳаракатларидан айрим жамоадошлари ҳам норози экани ҳақида хабарлар тарқалмоқда. Ушбу воқеалар фонида футболчининг машғулотга келмагани клубдаги ички муҳитни янада мураккаблаштириши мумкин.
