Italiya A Seriyasi hakamlar korpusi rahbari Janluka Rokki bilan bog‘liq mojaro yuzasidan yangi tafsilotlar ochiqlandi. Prokuratura Rokkini nohaq xatti-harakatlar, sport firibgarligi va «Inter» klubiga «ma’qul keladigan» hakamlarni tayinlashda ayblamoqda. Ushbu ayblovlar fonida Rokki o‘z vakolatlarini vaqtincha topshirdi.
Biroq AGI va ANSA kabi nufuzli Italiya nashrlarining xabar berishicha, na «Inter» klubi, na uning rahbariyati ushbu ish bo‘yicha gumonlanuvchi sifatida ko‘rilayotgani yo‘q. Tergov jarayoni faqat hakamlik tizimi vakillariga qaratilgan. Shuningdek, o‘rganilayotgan shubhali uchrashuvlarning hech biri joriy mavsumda o‘tkazilmagan.
Hozirda Janluka Rokkidan tashqari, iste’foga chiqqan VAR supervayzeri Andrea Jervazoni va bir qator VAR assistentlari (Daniele Paterne, Rodolfo Di Vuolo, Luiji Naska va boshqalar) tergov qilinmoqda. Hozircha «neradzurrilar» uchun qulay hakamlarni tanlab berishda aynan kim vositachilik qilgani noma’lum bo‘lib qolmoqda.
