Италия А Серияси ҳакамлар корпуси раҳбари Жанлука Рокки билан боғлиқ можаро юзасидан янги тафсилотлар очиқланди. Прокуратура Роккини ноҳақ хатти-ҳаракатлар, спорт фирибгарлиги ва «Интер» клубига «маъқул келадиган» ҳакамларни тайинлашда айбламоқда. Ушбу айбловлар фонида Рокки ўз ваколатларини вақтинча топширди.
Бироқ AGI ва ANSA каби нуфузли Италия нашрларининг хабар беришича, на «Интер» клуби, на унинг раҳбарияти ушбу иш бўйича гумонланувчи сифатида кўрилаётгани йўқ. Тергов жараёни фақат ҳакамлик тизими вакилларига қаратилган. Шунингдек, ўрганилаётган шубҳали учрашувларнинг ҳеч бири жорий мавсумда ўтказилмаган.
Ҳозирда Жанлука Роккидан ташқари, истеъфога чиққан VAR супервайзери Андреа Жервазони ва бир қатор VAR ассистентлари (Даниэле Патерне, Родольфо Ди Вуоло, Луижи Наска ва бошқалар) тергов қилинмоқда. Ҳозирча «нерадзуррилар» учун қулай ҳакамларни танлаб беришда айнан ким воситачилик қилгани номаълум бўлиб қолмоқда.
