La Liganing 32-turidan o‘rin olgan «Real Madrid» va «Betis» (1:1) uchrashuvi oldidan tribuna osti yo‘lagida qiziqarli voqea yuz berdi. «Qirollik klubi» yulduzi Vinisius Junior raqib jamoa vakili Antoni va uning farzandi bilan samimiy suhbatlashdi.
DAZN kameralariga muhrlangan kadrlarda Vinisiusning Antoniga qarata hazil qilganini ko‘rish mumkin: «Soch turmaging ajoyib. Endi sen jiddiy odamsan, ikki farzandning otasisan-a?». Shundan so‘ng Antoni o‘g‘lini chaqirib, Vinisius bilan tanishtirdi. Braziliyalik vinger bolakaydan: «Gollar urib turibsanmi? Kim kuchliroq — senmi yoki otangmi?» deb so‘radi.
Kichik Antoni nafaqat Vinisius, balki Kilian Mbappe bilan ham salomlashdi va Judu Bellingemdan o‘yindan so‘ng dastxat berishini iltimos qildi. Bolakayning o‘zini tutishidan hayratlangan Vinisius yana hazil bilan suhbatni yakunladi: «Bu bola hamma bilan gaplasharkan, hech kimdan tortinmaydi. Sen otangga o‘xshamabsan, undan ancha chiroylisan».
