Ла Лиганинг 32-туридан ўрин олган «Реал Мадрид» ва «Бетис» (1:1) учрашуви олдидан трибуна ости йўлагида қизиқарли воқеа юз берди. «Қироллик клуби» юлдузи Винисиус Жуниор рақиб жамоа вакили Антони ва унинг фарзанди билан самимий суҳбатлашди.

DAZN камераларига муҳрланган кадрларда Винисиуснинг Антонига қарата ҳазил қилганини кўриш мумкин: «Соч турмагинг ажойиб. Энди сен жиддий одамсан, икки фарзанднинг отасисан-а?». Шундан сўнг Антони ўғлини чақириб, Винисиус билан таништирди. Бразилиялик вингер болакайдан: «Голлар уриб турибсанми? Ким кучлироқ — сенми ёки отангми?» деб сўради.

Кичик Антони нафақат Винисиус, балки Килиан Мбаппе билан ҳам саломлашди ва Жуду Беллингемдан ўйиндан сўнг дастхат беришини илтимос қилди. Болакайнинг ўзини тутишидан ҳайратланган Винисиус яна ҳазил билан суҳбатни якунлади: «Бу бола ҳамма билан гаплашаркан, ҳеч кимдан тортинмайди. Сен отангга ўхшамабсан, ундан анча чиройлисан».