«Манчестер Сити» клубининг норвегиялик ҳужумчиси Эрлинг Холанд Мадриднинг «Реал» клубига ўтишга қизиқиш билдирмаяпти. Бу ҳақда ElNacional нашри хабар тарқатмоқда.

Манбанинг маълумотларига кўра, Холанд Хосеп Гвардиола «Манчестер Сити»ни тарк этганидан сўнг бошқа клубга ўтиш вариантини кўриб чиқишга тайёр. Бироқ қайд этилишича, ҳужумчи мадридликлар сафида Килиан Мбаппе ва Винисиус Жуниор тўп сураётган бир пайтда «Реал»га бориш ниятида эмас. Футболчи ушбу икки йирик юлдуз соясида қолишни истамаяпти.

Хабар қилинишича, Холанднинг «шаҳарликлар» билан амалдаги шартномасида 175 миллион евро миқдорида товон пули кўрсатиб ўтилган.

Ортда қолган 2025/26 йилги мавсумда Холанд барча турнирларда жами 52 та учрашувда майдонга тушиб, 38 та гол урди ва 9 та голли узатмани ўз ҳисобига ёздириб қўйди.