«Pari Sen-Jermen» vingeri Xvicha Kvarasxeliya Chempionlar Ligasining bitta mavsumida samarali harakatlar amalga oshirish bo‘yicha yangi klub rekordini o‘rnatdi. Gruziyalik futbolchi seshanba kuni «Bavariya»ga qarshi kechgan yarim final bahsida dubl qayd etib, g‘alaba (5:4) qahramonlaridan biriga aylandi.
Shu tariqa, 25 yoshli futbolchining Chempionlar Ligasi joriy mavsumidagi «gol+pas» tizimi bo‘yicha ochkolari 15 taga (10 ta gol va 5 ta assist) yetdi — bu «PSJ» tarixidagi yangi rekorddir. Avvalgi rekord Usmon Dembelega tegishli edi; u o‘tgan mavsumda jamoaning 14 ta golida (8 ta gol va 6 ta assist) bevosita ishtirok etgandi. Eslatib o‘tamiz, fransiyalik futbolchi o‘zining o‘sha ajoyib ishtiroki uchun o‘tgan kuzda «Oltin to‘p» sovrinini qo‘lga kiritgan edi.
«PSJ» va «Bavariya» o‘rtasidagi javob uchrashuvi 6 may kuni «Alyans Arena»da bo‘lib o‘tadi.
