«Пари Сен-Жермен» вингери Хвича Кварацхелия Чемпионлар Лигасининг битта мавсумида самарали ҳаракатлар амалга ошириш бўйича янги клуб рекордини ўрнатди. Грузиялик футболчи сешанба куни «Бавария»га қарши кечган ярим финал баҳсида дубль қайд этиб, ғалаба (5:4) қаҳрамонларидан бирига айланди.

Шу тариқа, 25 ёшли футболчининг Чемпионлар Лигаси жорий мавсумидаги «гол+пас» тизими бўйича очколари 15 тага (10 та гол ва 5 та ассист) етди — бу «ПСЖ» тарихидаги янги рекорддир. Аввалги рекорд Усмон Дембелега тегишли эди; у ўтган мавсумда жамоанинг 14 та голида (8 та гол ва 6 та ассист) бевосита иштирок этганди. Эслатиб ўтамиз, франциялик футболчи ўзининг ўша ажойиб иштироки учун ўтган кузда «Олтин тўп» совринини қўлга киритган эди.

«ПСЖ» ва «Бавария» ўртасидаги жавоб учрашуви 6 май куни «Альянц Арена»да бўлиб ўтади.