«Bavariya»ning hujum triosi joriy mavsumda yuzta gol marrasini zabt etdi. Xarri Keyn, Maykl Olise va Luis Dias Chempionlar Ligasi yarim finalida «PSJ»ga qarshi kechgan (4:5) bahsda yana o‘z mahoratlarini namoyish etishdi: ingliz hujumchisi bitta gol va bitta assist qayd etgan bo‘lsa, fransuz va kolumbiyalik futbolchilar bittadan gol urishga muvaffaq bo‘lishdi.
Endilikda ushbu uch futbolchining joriy mavsumdagi barcha turnirlarda urgan gollari soni umumiy 100 taga yetdi. Keyn 46 ta o‘yinda 54 bor raqiblar darvozasini ishg‘ol qilgan bo‘lsa, Dias xuddi shuncha o‘yinda 26 ta gol urdi. Olise hisobida esa 47 ta bahsda 20 ta gol mavjud.
«Bavariya» va «PSJ» o‘rtasidagi javob uchrashuvi 6 may kuni Myunxenda bo‘lib o‘tadi. Ushbu juftlik g‘olibi finalda Londonning «Arsenal» yoki Madridning «Atletiko» jamoasi bilan to‘qnash keladi.
