«Бавария»нинг ҳужум триоси жорий мавсумда юзта гол маррасини забт этди. Харри Кейн, Майкл Олисе ва Луис Диас Чемпионлар Лигаси ярим финалида «ПСЖ»га қарши кечган (4:5) баҳсда яна ўз маҳоратларини намойиш этишди: инглиз ҳужумчиси битта гол ва битта ассист қайд этган бўлса, француз ва колумбиялик футболчилар биттадан гол уришга муваффақ бўлишди.

Эндиликда ушбу уч футболчининг жорий мавсумдаги барча турнирларда урган голлари сони умумий 100 тага етди. Кейн 46 та ўйинда 54 бор рақиблар дарвозасини ишғол қилган бўлса, Диас худди шунча ўйинда 26 та гол урди. Олисе ҳисобида эса 47 та баҳсда 20 та гол мавжуд.

«Бавария» ва «ПСЖ» ўртасидаги жавоб учрашуви 6 май куни Мюнхенда бўлиб ўтади. Ушбу жуфтлик ғолиби финалда Лондоннинг «Арсенал» ёки Мадриднинг «Атлетико» жамоаси билан тўқнаш келади.