Seshanba kuni «Bavariya» Chempionlar ligasining dastlabki yarim finalida safarda «PSJ»ga imkoniyatni boy berdi (4:5). Myunxenliklar hujumchisi Harri Keyn 6 may kuni «Alyans Arena»da bo‘lib o‘tadigan javob uchrashuvidan nimalar kutayotgani haqida gapirib berdi.
«Biz xuddi shunday shiddatni saqlab qolishimiz kerak — keyingi haftada bu juda asqotadi. Hammasi kim o‘z imkoniyatlaridan yaxshiroq foydalanishiga bog‘liq bo‘ladi. Bugun vaziyatlar ko‘p bo‘ldi va javob o‘yinida ham, ehtimol, shunday manzarani ko‘ramiz. O‘z maydonimizda, muxlislarimiz qo‘llab-quvvatlashi ostida g‘alaba qozonishga umid qilamiz», — deya ingliz futbolchisining so‘zlarini keltiradi UYEFA.
Harri Keyn Parijdagi bahsning 17-daqiqasida penaltini aniq amalga oshirib, hisobni ochgan edi, shuningdek, 68-daqiqada Luis Diasga golli uzatma yetkazib berdi.
