«Arsenal» yarim himoyachisi Martin Edegor Chempionlar ligasining dastlabki yarim final uchrashuvi oldidan jamoadagi kayfiyat haqida gapirib berdi.
«G‘olib chiqmagunimizcha, «nimadir yetishmaydigan jamoa» degan tamg‘a biz bilan birga bo‘laveradi. Bu — biz ko‘nikishimiz kerak bo‘lgan holat. Biz mavjud tajriba va saboqlardan to‘g‘ri yo‘nalishda foydalanishimiz lozim. Bu futbolning va bosib o‘tiladigan yo‘lning bir qismidir. Biz hozirgi kun bilan yashashimiz kerak.
Ayni damda ishlarimiz juda yaxshi ketmoqda. APLda ham, Chempionlar ligasida ham ajoyib pozisiyadamiz. Endi bor e’tiborimizni eng yaxshi sport formasida bo‘lishga qaratishimiz kerak. Bundan qanday qilib zavqlanmaslik mumkin? Biz, ehtimol, dunyoning eng qiyin va raqobatbardosh ligasida o‘ynayapmiz, chempionlik uchun kurashyapmiz va Chempionlar ligasining yarim finalidamiz. Bundan zavq olmaslikni tasavvur qilish men uchun qiyin. Bu — bolaligimizdan, butun umrimiz davomida orzu qilgan lahzalarimiz. Bu mavsumning eng zo‘r qismi. Hamma tayyor, jamoadagi energiya shunchaki hayratlanarli», — deya 27 yoshli norvegiyalik futbolchining so‘zlarini keltiradi ESPN.
«Arsenal» 29 aprel kuni Madridda «Atletiko»ga qarshi maydonga tushadi. O‘yin Toshkent vaqti bilan tungi soat 00:00 da boshlanadi.
