«Арсенал» ярим ҳимоячиси Мартин Эдегор Чемпионлар лигасининг дастлабки ярим финал учрашуви олдидан жамоадаги кайфият ҳақида гапириб берди.

«Ғолиб чиқмагунимизча, «нимадир етишмайдиган жамоа» деган тамға биз билан бирга бўлаверади. Бу — биз кўникишимиз керак бўлган ҳолат. Биз мавжуд тажриба ва сабоқлардан тўғри йўналишда фойдаланишимиз лозим. Бу футболнинг ва босиб ўтиладиган йўлнинг бир қисмидир. Биз ҳозирги кун билан яшашимиз керак.

Айни дамда ишларимиз жуда яхши кетмоқда. АПЛда ҳам, Чемпионлар лигасида ҳам ажойиб позициядамиз. Энди бор эътиборимизни энг яхши спорт формасида бўлишга қаратишимиз керак. Бундан қандай қилиб завқланмаслик мумкин? Биз, эҳтимол, дунёнинг энг қийин ва рақобатбардош лигасида ўйнаяпмиз, чемпионлик учун курашяпмиз ва Чемпионлар лигасининг ярим финалидамиз. Бундан завқ олмасликни тасаввур қилиш мен учун қийин. Бу — болалигимиздан, бутун умримиз давомида орзу қилган лаҳзаларимиз. Бу мавсумнинг энг зўр қисми. Ҳамма тайёр, жамоадаги энергия шунчаки ҳайратланарли», — дея 27 ёшли норвегиялик футболчининг сўзларини келтиради ESPN.

«Арсенал» 29 апрель куни Мадридда «Атлетико»га қарши майдонга тушади. Ўйин Тошкент вақти билан тунги соат 00:00 да бошланади.