Londonning «Arsenal» klubi hujumchisi Viktor Dyokeresh Chempionlar ligasi yarim finali doirasida «Atletiko»ga qarshi kechadigan javob uchrashuvi Madriddagi bahsdan farq qilishiga ishonch bildirdi.
Chorshanba oqshomida Madridda kechgan dastlabki to‘qnashuvda jamoalar 1:1 hisobidagi durangga imzo chekishdi. E’tiborlisi, har ikki gol ham penaltidan kiritildi.
«Biz shuni bilamizki, o‘z uyimizda, muxlislarimiz qarshisida o‘ynaganimizda hammasi boshqacha bo‘ladi. Bu aniq. Biz shunchaki o‘z ishimizni bajarishimiz va eng yuqori darajadagi o‘yinimizni namoyish etishimiz kerak. Shundagina o‘z maydonimizda yaxshi natijaga erishamiz», — deya Dyokereshning so‘zlarini keltirmoqda TNT Sports.
Eslatib o‘tamiz, «Arsenal» va «Atletiko» o‘rtasidagi final yo‘llanmasi taqdiri 5 may kuni Londondagi «Emireyts» stadionida hal bo‘ladi. Madriddagi o‘yinda aynan Dyokeresh penaltini aniq amalga oshirib, mehmonlarni hisobda oldinga olib chiqqan edi.
