Лондоннинг «Арсенал» клуби ҳужумчиси Виктор Дьёкереш Чемпионлар лигаси ярим финали доирасида «Атлетико»га қарши кечадиган жавоб учрашуви Мадриддаги баҳсдан фарқ қилишига ишонч билдирди.

Чоршанба оқшомида Мадридда кечган дастлабки тўқнашувда жамоалар 1:1 ҳисобидаги дурангга имзо чекишди. Эътиборлиси, ҳар икки гол ҳам пенальтидан киритилди.

«Биз шуни биламизки, ўз уйимизда, мухлисларимиз қаршисида ўйнаганимизда ҳаммаси бошқача бўлади. Бу аниқ. Биз шунчаки ўз ишимизни бажаришимиз ва энг юқори даражадаги ўйинимизни намойиш этишимиз керак. Шундагина ўз майдонимизда яхши натижага эришамиз», — дея Дьёкерешнинг сўзларини келтирмоқда TNT Sports.

Эслатиб ўтамиз, «Арсенал» ва «Атлетико» ўртасидаги финал йўлланмаси тақдири 5 май куни Лондондаги «Эмирейтс» стадионида ҳал бўлади. Мадриддаги ўйинда айнан Дьёкереш пенальтини аниқ амалга ошириб, меҳмонларни ҳисобда олдинга олиб чиққан эди.