Madridning «Real» klubi yarim himoyachisi Dani Sebalyos, aftidan, jamoadagi so‘nggi oylarini o‘tkazmoqda. 29 yoshli futbolchi bosh murabbiy Alvaro Arbeloa bilan aytishib qolgan. Marca nashrining xabar berishicha, yarim himoyachi jamoadoshlariga murabbiydan uni hech qanday masalada bezovta qilmaslikni so‘raganini tan olgan.
Agar kutilmagan burilish yuz bermasa, futbolchi «qaymoqranglilar» safida boshqa maydonga tushmaydi va yozda jamoani tark etadi. Avvalroq Arbeloa Sebalyosni La Liga doirasidagi «Betis»ga qarshi o‘yin qaydnomasiga kiritmagan edi. Taxmin qilinayotgan nizo haqidagi to‘g‘ridan-to‘g‘ri berilgan savolga murabbiy ancha mavhum javob qaytardi va bu bilan mish-mishlarni yanada avj oldirdi.
