Мадриднинг «Реал» клуби ярим ҳимоячиси Дани Себальос, афтидан, жамоадаги сўнгги ойларини ўтказмоқда. 29 ёшли футболчи бош мураббий Альваро Арбелоа билан айтишиб қолган. Marca нашрининг хабар беришича, ярим ҳимоячи жамоадошларига мураббийдан уни ҳеч қандай масалада безовта қилмасликни сўраганини тан олган.
Агар кутилмаган бурилиш юз бермаса, футболчи «қаймоқранглилар» сафида бошқа майдонга тушмайди ва ёзда жамоани тарк этади. Аввалроқ Арбелоа Себальосни Ла Лига доирасидаги «Бетис»га қарши ўйин қайдномасига киритмаган эди. Тахмин қилинаётган низо ҳақидаги тўғридан-тўғри берилган саволга мураббий анча мавҳум жавоб қайтарди ва бу билан миш-мишларни янада авж олдирди.
