Madridning «Real» klubi sardori Daniel Karvaxal yaqin orada jamoasiga yordam bera olmaydi. 34 yoshli futbolchi oyoq barmog‘ining sinishi tufayli safdan chiqdi, bu haqda yaqinda klub rasmiy ma’lumot berdi.
Diario AS nashrining yozishicha, o‘ng qanot himoyachisining tiklanishi uchun taxminan ikki hafta vaqt talab etiladi. Shu tariqa, ispaniyalik futbolchi nafaqat «Espanyol»ga qarshi bo‘lajak o‘yinni, balki 10 may kuni bo‘lib o‘tadigan «Barselona» bilan to‘qnashuvni ham o‘tkazib yuboradi.
Joriy mavsumda Daniel Karvaxal jami 20 ta o‘yinda maydonga tushdi. Alvaro Arbeloa shogirdlari La Liga turnir jadvalida ikkinchi o‘rinni egallab turibdi va peshqadam «Barsa»dan 11 ochko ortda qolmoqda. Chempionat yakunigacha bor-yo‘g‘i besh tur qoldi.
