«Liverpul» bosh murabbiyi Arne Slotdan joriy mavsumga baho berishini so‘rashdi. «Qizillar» uchun ushbu mavsum avvalgisiga qaraganda ancha omadsiz kechmoqda. Hozirda mersisaydliklar Premyer-liga turnir jadvalida to‘rtinchi o‘rinni egallab turibdi, chempionat yakuniga esa to‘rtta tur qoldi.

«Mavsumni qanday baholayman? Bu qolgan to‘rtta o‘yin natijasiga bog‘liq. Albatta, men doimiy ravishda o‘z ishimni tahlil qilaman. Parijda beshta himoyachi bilan o‘ynash to‘g‘ri qarormidi? U yoki bu futbolchini maydonga tushirishda xato qilmadimmi? Mashg‘ulotlarda 11 ga 11 o‘yin o‘tkazish kerakmidi yoki kichik jamoalarga bo‘lingan ma’qulmidi? Bu to‘xtovsiz jarayon — har kuni 40-50 ta tanlovni amalga oshirishga to‘g‘ri keladi va keyin ularni o‘zing baholaysan. Yakunda hammasi "Mavsum qanday o‘tdi?" degan savolga taqaladi. Menda allaqachon ma’lum bir fikr shakllangan, ammo qolgan to‘rtta o‘yin natijasi mavsum yakunida o‘zimga beradigan bahoni tubdan o‘zgartirib yuborishi mumkin», — dedi Slot matbuot anjumanida.

Yakshanba kuni «Liverpul» safarda «Manchester Yunayted»ga qarshi bahs olib boradi.