Londonning «Arsenal» klubi bosh murabbiyi Mikel Arteta Maylz Lyuis-Skellining o‘yini haqida o‘z fikrlari bilan o‘rtoqlashdi. Shanba kuni 19 yoshli futbolchi «kanonirlar»ga «Fulxem»ni tor-mor etishda (3:0) yordam berdi va uchrashuvni boshidan oxirigacha maydonda o‘tkazdi.

«U bunga loyiq edi. Men unga nisbatan qattiqqo‘l bo‘ldim. U o‘tgan yili birinchi jamoada paydo bo‘lgan ilk kezlaridayoq o‘zini ajoyib ko‘rsatgandi. Keyinchalik unda qiyinchiliklar yuzaga keldi, biroq u xotirjamlikni saqlab qoldi, bor e’tiborini ishga qaratdi va talablarga quloq tutdi. Men uning tayyor ekanligini bilardim. Maylz har bir mashg‘ulotda o‘z salohiyatini isbotlab keldi va «Fulxem» bilan o‘yinda haqiqiy yuksalishga erishdi. Hayratlanarli ishtirok», – dedi Arteta matbuot anjumanida.

Seshanba kuni, 5 may sanasida «Arsenal» Chempionlar ligasi yarim finali doirasida «Atletiko»ga qarshi javob uchrashuvini o‘tkazadi.