Kichik Robinyo Neymar bilan yuzaga kelgan mojarodan so‘ng «Santos» rahbariyatiga shikoyat bilan murojaat qildi.

Eslatib o‘tamiz, yakshanba kuni Braziliya jamoasining mashg‘ulotida futbolchilar o‘rtasida to‘qnashuv sodir bo‘lgan edi — 34 yoshli hujumchi 18 yoshli vinger uni aldab o‘tganidan norozi bo‘lgan va buni hurmatsizlik deb baholab, «xotirjamroq o‘ynashni» so‘ragan. Mojaro bir-birini itarib yuborish va kichik mushtlashuvga aylanib ketgan. Guvohlarning so‘zlariga ko‘ra, Neymar avvaliga raqibiga oyoq qo‘ygan, keyin esa, ehtimol, uni urgan bo‘lishi ham mumkin.

Globo nashrining xabar berishicha, dushanba kuni Robinyoning vakillari klub rahbarlariga ushbu vaziyat yuzasidan chora ko‘rish talabi bilan ogohlantirish xati yuborishgan. 18 yoshli futbolchining ta’kidlashicha, jamoadoshi uni haqorat qilgan, oyog‘iga zarba bergan va yuziga qattiq urgan.

Robinyo tomoni «Santos»dan sodir bo‘lgan voqeani o‘rganish uchun ichki tekshiruv boshlashni va ko‘rilgan choralar yuzasidan rasmiy bayonot berishni talab qildi. Bundan tashqari, futbolchining vakillari klubda «minimal xavfsizlik shartlari yo‘qligi» sababli shartnomani bekor qilish masalasini muhokama qilish uchun rahbariyat bilan uchrashuv tashkil etishni so‘rashmoqda.