Кичик Робиньо Неймар билан юзага келган можародан сўнг «Сантос» раҳбариятига шикоят билан мурожаат қилди.

Эслатиб ўтамиз, якшанба куни Бразилия жамоасининг машғулотида футболчилар ўртасида тўқнашув содир бўлган эди — 34 ёшли ҳужумчи 18 ёшли вингер уни алдаб ўтганидан норози бўлган ва буни ҳурматсизлик деб баҳолаб, «хотиржамроқ ўйнашни» сўраган. Можаро бир-бирини итариб юбориш ва кичик муштлашувга айланиб кетган. Гувоҳларнинг сўзларига кўра, Неймар аввалига рақибига оёқ қўйган, кейин эса, эҳтимол, уни урган бўлиши ҳам мумкин.

Globo нашрининг хабар беришича, душанба куни Робиньонинг вакиллари клуб раҳбарларига ушбу вазият юзасидан чора кўриш талаби билан огоҳлантириш хати юборишган. 18 ёшли футболчининг таъкидлашича, жамоадоши уни ҳақорат қилган, оёғига зарба берган ва юзига қаттиқ урган.

Робиньо томони «Сантос»дан содир бўлган воқеани ўрганиш учун ички текширув бошлашни ва кўрилган чоралар юзасидан расмий баёнот беришни талаб қилди. Бундан ташқари, футболчининг вакиллари клубда «минимал хавфсизлик шартлари йўқлиги» сабабли шартномани бекор қилиш масаласини муҳокама қилиш учун раҳбарият билан учрашув ташкил этишни сўрашмоқда.