«Barselona» himoyachisi Jyul Kunde faoliyatini Angliya Premyer-ligasida davom ettirishi mumkin. Bu haqda Ispaniyaning Mundo Deportivo nashri xabar bermoqda.
Manbaga ko‘ra, «Liverpul» klubi o‘ng qanot himoyasi tizimini mustahkamlash maqsadida fransiyalik futbolchini asosiy nishon sifatida belgilagan. Mersisaydliklar ushbu transferni amalga oshirish uchun «sezilarli darajada katta summa» to‘lashga tayyor ekanliklarini bildirishgan.
O‘z navbatida, moliyaviy qiyinchiliklarni boshdan kechirayotgan «Barselona» rahbariyati ham Kundening sotilishini istisno etmayapti. Agar ingliz klubidan manfaatli taklif tushsa, kataloniyaliklar 25 yoshli himoyachi bilan xayrlashishga rozi bo‘lishlari mumkin.
