Djanluka Prestianniga berilgan jazo chorasi kengaytirilib, endi terma jamoalar miqyosidagi o‘yinlarga ham tatbiq etiladigan bo‘ldi.

Voqealar rivoji quyidagicha bo‘lgan edi:

Fevral oyida Chempionlar ligasi 1/8 finaliga chiqish uchun kechgan bahsda «Real» «Benfika»ni 1:0 hisobida mag‘lub etgandi. O‘yin davomida Vinisius Junior hakam Fransua Letesyega murojaat qilib, Prestianni uni haqorat qilganini aytgan. «Benfika» vingeri esa bu ayblovlarni rad etib, rasistik so‘zlar ishlatmaganini ta’kidlagan edi.

Keyinchalik UEFA Djanlukani yevrokuboklardagi 6 ta o‘yinga diskvalifikasiya qildi (buning 3 tasi shartli jazo hisoblanadi). Prestianni allaqachon bitta o‘yinlik cheklovni o‘tab bo‘lgan.

Endilikda FIFA ushbu jazoni xalqaro darajaga ko‘tardi. Bu degani:

Agar Prestianni Argentina terma jamoasiga chaqirilsa, u JCH-2026 guruh bosqichidagi dastlabki ikkita o‘yinni o‘tkazib yuborishga majbur bo‘ladi.

Bu yosh iqtidor egasi va Argentina terma jamoasi uchun kutilmagan zarba bo‘ldi, chunki Jahon chempionati boshlanishiga juda oz vaqt qolmoqda.