Bugun, 10 may kuni Italiya A Seriyasining 36-turi doirasida "Komo" jamoasi safarda "Verona" ustidan g‘alaba qozondi. Ushbu muvaffaqiyat Sesk Fabregas shogirdlariga turnir jadvalining 5-pog‘onasiga ko‘tarilish imkonini berdi.

E’tiborli jihati shundaki, qolgan ikki tur natijasidan qat’i nazar, "Komo" 6-o‘rindan pastga tushib ketmaydigan bo‘ldi. Bu esa klub o‘z tarixida ilk bor 2026/2027 yilgi mavsumda yevrokuboklarda ishtirok etishini anglatadi.

Ma’lumot uchun, Italiya chempionatida 6-o‘rinni egallagan jamoa Konferensiyalar ligasiga, 5-o‘rin esa Yevropa ligasiga yo‘llanma beradi. Kuchli to‘rtlikdan joy olgan klublar esa mamlakat sharafini Chempionlar ligasida himoya qiladi.

"Komo" mavsumning qolgan ikki turida "Parma" va "Kremoneze" jamoalariga qarshi bahs olib boradi. Ushbu o‘yinlar jamoaning aynan qaysi xalqaro musobaqada qatnashishiga oydinlik kiritib beradi.