Angliyalik mashhur ekspert Jeymi Karrager Premyer-liga finishi oldidan "Tottenxem"ning murakkab holati haqida o‘z fikrlari bilan o‘rtoqlashdi. Ayni damda London klubi xavfli zonadan atigi ikki ochko yuqorida turibdi. Oldinda esa jamoani "Chelsi" va "Everton"ga qarshi ikkita hal qiluvchi bahs kutmoqda.

Karragerning fikricha, ayniqsa "Chelsi"ga qarshi o‘yin nafaqat turnir jadvali, balki azaliy raqobat nuqtai nazaridan ham keskin o‘tadi:

"Chelsi" uchun kubok finali qanday yakunlanishini kim biladi deysiz, lekin stadiondagi muhitni hozirdanoq tasavvur qilyapman. Bu — futbol va ulkan raqobat. "Ko‘klar" "Tottenxem"ni quyi ligaga ravona qilish va so‘nggi tur oldidan ularni chorasiz ahvolga solib qo‘yish uchun borini berishi aniq.

Bu holat ularga qanchalik yordam berishini esa faqat "Nyukasl" ishtirokidagi o‘yindan keyin bilib olamiz. Agar "Vest Xem" ushbu bahsda mag‘lub bo‘lsa, ular xotirjamlikka berilishi mumkin. Ammo tasavvur qiling, agar "bolg‘achilar" g‘alaba qozonsa, "Tottenxem" "Chelsi" maydonida albatta ijobiy natija qayd etishiga to‘g‘ri keladi", — deydi Karrager.