Ispaniya ommaviy axborot vositalari Madridning «Real» klubi nima sababdan hakamlikdan norozi ekanini tushuntiruvchi statistikani e’lon qildi. Bu haqda Diario AS nashri xabar bermoqda.

Ma’lum bo‘lishicha, joriy mavsumda «qaymoqranglilar» La Ligada VAR tizimining aralashuvidan eng ko‘p «jabr ko‘rgan» jamoaga aylangan. Tizim madridliklarga qarshi 11 marta qaror chiqargan bo‘lsa, faqatgina 3 holatda «Real» foydasiga xulosa bergan. Bu Ispaniya chempionati klublari orasidagi eng yomon ko‘rsatkich (manfiy balans) hisoblanadi.

Taqqoslash uchun «Barselona»ning statistikasi keltirilgan: kataloniyaliklar foydasiga chiqarilgan qarorlar raqiblar foydasiga chiqarilganlaridan 5 taga ko‘p.

Eslatib o‘tamiz, «Barselona» yaqinda 35-tur doirasida «Real»ga qarshi kechgan bahsda (2:0) g‘alaba qozonib, muddatidan oldin chempionlikni qo‘lga kiritgan edi. Alvaro Arbeloa boshchiligidagi Madrid jamoasi hozirda «ko‘k-anorranglilar»dan 14 ochkoga ortda qolmoqda.