Испания оммавий ахборот воситалари Мадриднинг «Реал» клуби нима сабабдан ҳакамликдан норози эканини тушунтирувчи статистикани эълон қилди. Бу ҳақда Diario AS нашри хабар бермоқда.

Маълум бўлишича, жорий мавсумда «қаймоқранглилар» Ла Лигада ВАР тизимининг аралашувидан энг кўп «жабр кўрган» жамоага айланган. Тизим мадридликларга қарши 11 марта қарор чиқарган бўлса, фақатгина 3 ҳолатда «Реал» фойдасига хулоса берган. Бу Испания чемпионати клублари орасидаги энг ёмон кўрсаткич (манфий баланс) ҳисобланади.

Таққослаш учун «Барселона»нинг статистикаси келтирилган: каталонияликлар фойдасига чиқарилган қарорлар рақиблар фойдасига чиқарилганларидан 5 тага кўп.

Эслатиб ўтамиз, «Барселона» яқинда 35-тур доирасида «Реал»га қарши кечган баҳсда (2:0) ғалаба қозониб, муддатидан олдин чемпионликни қўлга киритган эди. Альваро Арбелоа бошчилигидаги Мадрид жамоаси ҳозирда «кўк-анорранглилар»дан 14 очкога ортда қолмоқда.