Angliya Chempionshipida Premyer-ligaga yo‘l beradigan uchinchi yo‘llanma uchun kurashadigan jamoalar nomi aniqlandi. Pley-offning yarim final bosqichlari yakunlanib, hal qiluvchi bahsda «Xall Siti» va «Sautgempton» jamoalari to‘qnash keladigan bo‘lishdi.
«Xall» yarim finalda «Milluoll» to‘sig‘idan o‘tishga muvaffaq bo‘ldi. Dastlabki o‘yinda darvozalar daxlsiz qolgan bo‘lsa (0:0), javob uchrashuvida «yo‘lbarslar» 2:0 hisobida g‘alaba qozonib, final yo‘llanmasini qo‘lga kiritishdi.
Ikkinchi juftlikda esa «Sautgempton» «Midlsbro»dan ustun keldi. Ushbu jamoalar o‘rtasidagi birinchi bahsda ham hisob ochilmagandi. Ikkinchi o‘yinda esa «avliyolar» 2:1 hisobida zafar quchib, elitaga qaytish imkoniyatini saqlab qolishdi.
APL yo‘llanmasi taqdirini hal qiluvchi o‘yin 23 may kuni Londondagi mashhur «Uembli» stadionida bo‘lib o‘tadi.
