Англия Чемпионшипида Премьер-лигага йўл берадиган учинчи йўлланма учун курашадиган жамоалар номи аниқланди. Плей-оффнинг ярим финал босқичлари якунланиб, ҳал қилувчи баҳсда «Халл Сити» ва «Саутгемптон» жамоалари тўқнаш келадиган бўлишди.

«Халл» ярим финалда «Миллуолл» тўсиғидан ўтишга муваффақ бўлди. Дастлабки ўйинда дарвозалар дахлсиз қолган бўлса (0:0), жавоб учрашувида «йўлбарслар» 2:0 ҳисобида ғалаба қозониб, финал йўлланмасини қўлга киритишди.

Иккинчи жуфтликда эса «Саутгемптон» «Мидлсбро»дан устун келди. Ушбу жамоалар ўртасидаги биринчи баҳсда ҳам ҳисоб очилмаганди. Иккинчи ўйинда эса «авлиёлар» 2:1 ҳисобида зафар қучиб, элитага қайтиш имкониятини сақлаб қолишди.

АПЛ йўлланмаси тақдирини ҳал қилувчи ўйин 23 май куни Лондондаги машҳур «Уэмбли» стадионида бўлиб ўтади.