Eronlik hujumchi Serdar Azmun kelayotgan yozgi transfer oynasida Rossiya chempionatiga qaytishi mumkin. Ushbu imkoniyatni futbolchining agenti Mehdi Xagitali istisno etmadi.

«Serdar Rossiyaga qaytishdan doim xursand! Shu yozda qaytish imkoniyati, albatta, mavjud. Agar RPL klublaridan biridan munosib taklif tushsa, biz uni ko‘rib chiqishga tayyormiz», — deya Xagitalining so‘zlarini keltiradi Sport24.

Shu bilan birga, agent hozirda Azmunning transferi bo‘yicha birorta ham aniq taklif yo‘qligini qo‘shimcha qildi.

Ma’lumot uchun, 31 yoshli Serdar Azmun ayni damda BAAning «Shabab Al-Ahli» klubi sharafini himoya qilmoqda. Transfermarkt portali mutaxassislari hujumchini 7 million yevroga baholashgan. Eslatib o‘tamiz, Azmun faoliyati davomida Rossiyada «Rubin», «Rostov» va «Zenit» jamoalarida to‘p surgan.