Italiyaning «Roma» klubi «Aston Villa» hujumchisi Doniell Malenning transfer huquqini sotib olish bandini faollashtirdi.
Rimliklar 27 yoshli Niderlandiya terma jamoasi a’zosi uchun 25 million yevro to‘laydigan bo‘ldi. Qayd etilishicha, «Roma»ning yevrokuboklarga yo‘llanma olishi transfer borasidagi kelishuvning avtomatik tarzda amalga oshishini ta’minlagan.
Malen joriy yilning yanvar oyida ijara asosida «Roma» safiga kelib qo‘shilgan edi. U A Seriyaning 16 ta uchrashuvida maydonga tushib, 13 ta gol va 2 ta golli uzatmaga mualliflik qildi. Uning mahsuldor o‘yini jamoaning muvaffaqiyatlarida muhim rol o‘ynadi.
Ma’lumot uchun, A Seriyaning 36 turidan so‘ng «Roma» turnir jadvalida 5-o‘rinni egallab turibdi. Faoliyati davomida Malen «Borussiya Dortmund», PSV klublarida, shuningdek, «Arsenal» va «Ayaks» jamoalarining yoshlar tizimida to‘p surgan.
