Италиянинг «Рома» клуби «Астон Вилла» ҳужумчиси Дониэлл Маленнинг трансфер ҳуқуқини сотиб олиш бандини фаоллаштирди.

Римликлар 27 ёшли Нидерландия терма жамоаси аъзоси учун 25 миллион евро тўлайдиган бўлди. Қайд этилишича, «Рома»нинг еврокубокларга йўлланма олиши трансфер борасидаги келишувнинг автоматик тарзда амалга ошишини таъминлаган.

Мален жорий йилнинг январь ойида ижара асосида «Рома» сафига келиб қўшилган эди. У А Сериянинг 16 та учрашувида майдонга тушиб, 13 та гол ва 2 та голли узатмага муаллифлик қилди. Унинг маҳсулдор ўйини жамоанинг муваффақиятларида муҳим рол ўйнади.

Маълумот учун, А Сериянинг 36 туридан сўнг «Рома» турнир жадвалида 5-ўринни эгаллаб турибди. Фаолияти давомида Мален «Боруссия Дортмунд», ПСВ клубларида, шунингдек, «Арсенал» ва «Аякс» жамоаларининг ёшлар тизимида тўп сурган.