Madridning «Real» klubi prezidenti Florentino Peres jamoa yulduzi Vinisius Junior bilan amaldagi shartnomani uzaytirish bo‘yicha muzokaralar haqida to‘xtalib o‘tdi.

Klub rahbarining ta’kidlashicha, bu masalada ortiqcha shoshma-shosharlikka o‘rin yo‘q.

«Vinisius bilan shartnomani uzaytirishga shoshilmayapmiz. Oldimizda muzokaralar uchun hali butun boshli mavsum bor. Ko‘pchilik hamma narsaga men javob beraman deb o‘ylaydi, lekin bu sport direktorining ishi. Shuni aytishim mumkinki, Vini — «Real»ning eng yaxshi o‘yinchilaridan biri. So‘nggi Chempionlar Ligasidagi g‘alabamizni aynan u ta’minlab bergandi», — deya Peresning so‘zlarini keltiradi insayder Fabrisio Romano.

Ma’lumot uchun, 25 yoshli braziliyalik hujumchi 2018 yildan buyon «qirollik klubi» sharafini himoya qilib kelmoqda. Uning madridliklar bilan amaldagi kelishuvi 2027 yilning yoziga qadar mo‘ljallangan.

Joriy mavsumda Vinisius barcha turnirlarda 51 ta o‘yinda maydonga tushib, 21 ta gol urdi va 14 ta golli uzatmaga mualliflik qildi.