Мадриднинг «Реал» клуби президенти Флорентино Перес жамоа юлдузи Винисиус Жуниор билан амалдаги шартномани узайтириш бўйича музокаралар ҳақида тўхталиб ўтди.

Клуб раҳбарининг таъкидлашича, бу масалада ортиқча шошма-шошарликка ўрин йўқ.

«Винисиус билан шартномани узайтиришга шошилмаяпмиз. Олдимизда музокаралар учун ҳали бутун бошли мавсум бор. Кўпчилик ҳамма нарсага мен жавоб бераман деб ўйлайди, лекин бу спорт директорининг иши. Шуни айтишим мумкинки, Вини — «Реал»нинг энг яхши ўйинчиларидан бири. Сўнгги Чемпионлар Лигасидаги ғалабамизни айнан у таъминлаб берганди», — дея Переснинг сўзларини келтиради инсайдер Фабрицио Романо.

Маълумот учун, 25 ёшли бразилиялик ҳужумчи 2018 йилдан буён «қироллик клуби» шарафини ҳимоя қилиб келмоқда. Унинг мадридликлар билан амалдаги келишуви 2027 йилнинг ёзига қадар мўлжалланган.

Жорий мавсумда Винисиус барча турнирларда 51 та ўйинда майдонга тушиб, 21 та гол урди ва 14 та голли узатмага муаллифлик қилди.