«Barselona» klubi ijtimoiy tarmoqdagi sahifasi orqali hujumchi Robert Levandovski bilan xayrlashdi. Avvalroq polshalik futbolchi mavsum oxirida jamoani tark etishini rasman e’lon qilgan edi.

“Yulduz bo‘lib kelding — afsona bo‘lib ketyapsan.

Har bir gol, har bir kurash va ushbu libsodagi har bir unutilmas lahza uchun rahmat, Robert Levandovski. «Kules» seni abadiy eslab qoladi”, — deyiladi kataloniyaliklar bayonotida.

Levandovski «Barselona» safiga 2022 yil yozida kelib qo‘shilgan edi. Shu vaqt davomida 37 yoshli hujumchi barcha musobaqalarda 191 ta o‘yinda qatnashib, 119 ta gol va 24 ta golli uzatma amalga oshirdi.

Polshalik futbolchi «Barselona» bilan:

— 3 marta Ispaniya chempioni,
— 3 karra Ispaniya Superkubogi g‘olibi,
— 1 marta Ispaniya Kubogi sohibi bo‘ldi.