Xosep Gvardiolaning «Manchester Siti»dagi kelajagi jiddiy so‘roq ostida qoldi. «Daily Mail» nashrining jurnalist Jek Goganga tayanib xabar berishicha, ingliz klubi ichidagilar ispaniyalik mutaxassis shu yozda jamoani tark etishiga ishonmoqdalar.

Manbaning ma’lumotiga ko‘ra, murabbiy ketish borasidagi qarorini bir necha hafta oldin qabul qilib bo‘lgan. Ehtimol, yaqin kunlarda bu borada rasmiy bayonot berilishi mumkin.

Gvardiolaning klub bilan amaldagi shartnomasi 2027 yil yozigacha mo‘ljallangan bo‘lib, u jamoani 2016 yil yozidan beri boshqarib kelmoqda. APLning joriy mavsumida Gvardiola jamoasi 77 ochko jamg‘argan va mavsum yakunilanishiga ikki tur qolganda «Arsenal»dan ikki ochko ortda qolgan holda turnir jadvalida ikkinchi o‘rinda bormoqda.