Dushanba kuni «Barselona» bosh murabbiy Xans-Diter Flik bilan shartnoma uzaytirilganini e’lon qildi. Germaniyalik mutaxassis 2028 yilning o‘rtalariga qadar mo‘ljallangan yangi mehnat bitimiga imzo chekdi. Unda hamkorlikni yana bir mavsumga uzaytirish opsiyasi (huquqi) ham ko‘zda tutilgan.
Shartnoma uzaytirilganidan so‘ng Flik o‘z munosabatini bildirib o‘tdi.
«Men har kuni klubning, murabbiylar shtabining, futbolchilar va muxlislarning ehtirosini his qilaman. Bu aql bovar qilmas darajada. Men uchun bu juda ham alohida ahamiyatga ega. Biz birgalikda ko‘plab ajoyib lahzalarni baham ko‘rdik, biroq menda hali ham yangi zafarlarga chanqoqlik bor — ko‘proq sovrinlar yutishni xohlayman. Ishonch uchun rahbariyatga minnatdorchilik bildiraman. Men juda baxtliman», — deya Flikning so‘zlaridan iqtibos keltirmoqda AS nashri.
Xans-Diter Flik boshqaruvidagi ikki mavsum davomida «Barselona» Ispaniya ichki arenasida jami beshta sovrinni qo‘lga kiritdi — ikki bor La Liga chempionligi, bir marta mamlakat Kubogi va ikki bor Superkubok.
