«An-Nasr» Osiyo Chempionlar Ligasi 2 finalida «Gamba Osaka»ga (0:1) mag‘lub bo‘lganidan so‘ng, Krishtianu Ronaldu sukut saqlayotgan edi. Yulduz futbolchi bir necha kun davomida ijtimoiy tarmoqlarda hech qanday post qoldirmadi.
Seshanba kuni Ronaldu Portugaliya terma jamoasining JCH-2026 uchun qaydnomasidan joy olgani ma’lum bo‘ldi. Shundan so‘ng, portugaliyalik to‘purar birdaniga bir nechta post joylashtirdi — u dastlab «An-Nasr»ning navbatdagi o‘yini anonsini, keyin esa Portugaliya terma jamoasi akkaunti tomonidan chiqarilgan JCH-2026 qaydnomasini o‘z sahifasiga repost qildi.
21 may kuni «An-Nasr» o‘z maydonida «Damak» klubini qabul qiladi. Agar «An-Nasr» ushbu bahsda g‘alaba qozonsa, muddatidan oldin Saudiya Arabistoni chempioniga aylanadi. Bu Ronaldu uchun «An-Nasr» safidagi ilk rasmiy sovrin bo‘lishi mumkin.
