«Bornmut» bosh murabbiyi Andoni Iraola «Arsenal» chempionlikni qo‘lga kiritganidan so‘ng, Mikel Artetadan biror sovg‘a kutyaptimi-yo‘qmi — ushbu savolga javob berdi.

«Kanonirlar» APL 37-turida «Bornmut»ning «Manchester Siti» bilan durang o‘ynaganidan (1:1) keyin muddatidan oldin chempionlikni naqd qilishgan edi.

«Biror sovg‘a olsam, juda zo‘r bo‘lardi! Telefonimni hali tekshirib ko‘rmadim — har holda bitta bo‘lsa ham xabar yoki shunga o‘xshash nimadir kelgan bo‘lishi kerak. Ammo bu faqatgina mana shu o‘yin tufayli sodir bo‘lgani yo‘q. Ular baribir bu masalani o‘zlari hal qilishgan bo‘lardi.

Men u (Arteta) uchun xursandman, chunki u aql bovar qilmas ishni amalga oshirdi. So‘nggi bir necha mavsumda ular juda barqaror o‘yin ko‘rsatishdi va ba’zida maqsadga juda-juda yaqin kelishgandi. Ehtimol, mukofot ayni vaqtida keldi. Bundan tashqari, ular Chempionlar Ligasi finalida ham o‘ynashadi — bu shunchaki dahshat. Umid qilamanki, ular u yerda ham o‘z vazifalarini bajarishadi», – dedi Iraola.