«Борнмут» бош мураббийи Андони Ираола «Арсенал» чемпионликни қўлга киритганидан сўнг, Микель Артетадан бирор совға кутяптими-йўқми — ушбу саволга жавоб берди.

«Канонирлар» АПЛ 37-турида «Борнмут»нинг «Манчестер Сити» билан дуранг ўйнаганидан (1:1) кейин муддатидан олдин чемпионликни нақд қилишган эди.

«Бирор совға олсам, жуда зўр бўларди! Телефонимни ҳали текшириб кўрмадим — ҳар ҳолда битта бўлса ҳам хабар ёки шунга ўхшаш нимадир келган бўлиши керак. Аммо бу фақатгина мана шу ўйин туфайли содир бўлгани йўқ. Улар барибир бу масалани ўзлари ҳал қилишган бўларди.

Мен у (Артета) учун хурсандман, чунки у ақл бовар қилмас ишни амалга оширди. Сўнгги бир неча мавсумда улар жуда барқарор ўйин кўрсатишди ва баъзида мақсадга жуда-жуда яқин келишганди. Эҳтимол, мукофот айни вақтида келди. Бундан ташқари, улар Чемпионлар Лигаси финалида ҳам ўйнашади — бу шунчаки даҳшат. Умид қиламанки, улар у ерда ҳам ўз вазифаларини бажаришади», – деди Ираола.