Аргентиналик ҳужумчи Лионель Месси ва португалиялик юлдуз Криштиану Роналду яна бир бор бир майдонда тўп суриши мумкин. Бу ҳақда ESPN Argentina хабар берди.
Манба маълумотига кўра, Аргентина терма жамоасининг собиқ ҳужумчиси Карлос Тевес ўз ватанида хайрлашув учрашувини ташкил этишни режалаштирмоқда. Ўйин 19 декабрь куни ўтказилиши кутилмоқда.
Тарқалаётган хабарларга қараганда, Тевес фаолияти давомида бирга тўп сурган қарийб 60 нафар футболчини мазкур учрашувга таклиф қилмоқчи. Меҳмонлар орасида Лионель Месси, Криштиану Роналду, Уэйн Руни, Андреа Пирло ва бошқа кўплаб футбол юлдузлари бўлиши мумкин.
Карлос Тевес ҳозир 42 ёшда. У 2022 йил июнь ойида футболчилик фаолиятини расман якунлаган.
