“Manchester Yunayted” bosh murabbiyi Maykl Kerrik jamoaning yangi darajaga chiqqani borasida o‘z fikrlari bilan o‘rtoqlashdi.

“Menimcha, bu o‘rinda ikkita muhim jihatga e’tibor qaratish lozim. Biz kelajakda erishmoqchi bo‘lgan maqsadimiz va hozirgi holatimiz o‘rtasidagi farqni hamda u yerga yetib borish uchun qanday qadamlar tashlash kerakligini aniq tushunishimiz kerak. Ushbu darajada o‘yin ko‘rsatganimizning o‘zi ajoyib natija deb o‘ylayman. Buning uchun futbolchilarga chin dildan rahmat aytish lozim. Ammo endi o‘sishda davom etishimiz shart”, dedi murabbiy.

Shuningdek, Kerrik jamoani rivojlantirish va tarkibdagi ijrochilarning imkoniyatlari haqida ham to‘xtaldi.

“Tarkibni rivojlantirish bevosita muhim jarayon, biroq bu hozirgi futbolchilarimizda kamchiliklar borligini anglatmaydi. Shunchaki doim oldinga harakat qilishimiz kerak. Jamoamizda yaxshi ijrochilar yig‘ilgan, endi o‘yinni yanada mukammallashtirish ustida ishlash lozim”, deya qo‘shimcha qildi Kerrik.

Angliyalik mutaxassis ehtimoliy transferlar va yosh o‘yinchilarning jamoaga qo‘shadigan hissasi haqida ham ochiqladi:

“Agar yangi transferlar talab etilsa, buni albatta amalga oshiramiz. Bu borada yosh futbolchilar ham bizga katta yordam bera oladi, klub safidagi o‘yinlar ular uchun o‘ziga xos tajriba maktabi bo‘ladi”.

So‘nggi muvaffaqiyatlarga erishishda sirli yo‘l yo‘qligini aytgan murabbiy, barchasi faqat mehnatga bog‘liqligini qayd etdi.

“Biz faqat oldinga intilishimiz kerak, muvaffaqiyatning hech qanday siri yo‘q. Buning uchun faqat tinimsiz mehnat, to‘g‘ri strategiya va tarkibda yuqori saviyali futbolchilar bo‘lishi talab etiladi”, deya so‘zini yakunladi Maykl Kerrik.

Ma’lumot uchun, Angliya Premyer Ligasining 37-turidan keyin “Manchester Yunayted” 68 ochko bilan 3-pog‘onani egallab turibdi. Klub qolgan bahslarda mag‘lub bo‘lsa ham kuchli uchlikni tark etmaydi.