Paulo Dibala va «Roma» klubi amaldagi shartnomani uzaytirishga juda yaqin turishibdi.

«La Gazzetta dello Sport» nashrining ma’lumotlariga ko‘ra, «Roma» 32 yoshli yarim himoyachiga shartnomani yana bir yilga uzaytirish imkoniyati bilan bir yillik bitim taklif qilgan. Kelishuvga binoan, futbolchining yillik maoshi 2–2,5 million yevroni tashkil etadi, shuningdek, unda shaxsiy va jamoaviy natijalar uchun erishilishi oson bo‘lgan yirik miqdordagi bonuslar ham ko‘zda tutilgan. Shu yozda yakuniga yetadigan amaldagi shartnomasiga ko‘ra, Dibala soliqlar to‘langanidan keyin yiliga 8 million yevro maosh oladi, biroq Paulo Rim klubida qolish uchun maoshining sezilarli darajada kamayishiga rozi bo‘lgan.

Xabar qilinishicha, «Roma» Dibala bilan shartnoma uzaytirilganini dushanba kuni — A Seriyaning so‘nggi turidan o‘rin olgan «Verona»ga qarshi uchrashuvning ertasigayoq rasman e’lon qilishi mumkin.