"Real Madrid" prezidenti lavozimi uchun asosiy ehtimoliy raqobatchilardan biri sanalgan Enrike Rikelme klubni katta o‘zgarishlar kutayotganini ma’lum qildi.

El Confidencial xabariga ko‘ra, 37 yoshli ispaniyalik biznesmen “Real”ni yana eng yuqori darajaga qaytarish uchun ikki yirik rejani tayyorlagan. U Yurgen Kloppni bosh murabbiy, Erling Xolandni esa jamoaning yangi yetakchi yulduzi sifatida ko‘rmoqda.

Manbaga ko‘ra, Rikelme atrofidagi vakillar allaqachon "Manchester Siti" hujumchisi Xolandning Madridga ko‘chib o‘tish ehtimolini o‘rganish maqsadida uning atrofidagilar bilan aloqaga chiqqan. Norvegiyalik futbolchining angliyaliklar bilan amaldagi shartnomasi 2034 yilgacha mo‘ljallangan.

Shuningdek, Rikelme klub rulda aynan Kloppni ko‘rishni istamoqda. Qayd etilishicha, Joze Mourinyu uning loyihasida variant sifatida ko‘rilmayapti.

Xabarda aytilishicha, ispaniyalik tadbirkor hozirda Red Bull futbol yo‘nalishi global direktori sifatida ishlayotgan Kloppning agentlari bilan bir necha marta uchrashuv o‘tkazib, nemis mutaxassisini “Real”ni boshqarishga ko‘ndirishga harakat qilgan.