Ispaniyalik mashhur futbolchi Xuan Mata olis Avstraliyada o‘z o‘yinlari bilan muxlislarni xushnud etishda davom etmoqda.

Angliyaning «Manchester Yunayted» klubi sobiq a’zosi mahalliy chempionatda bir yo‘la ikkita nufuzli individual sovrinni qo‘lga kiritdi.

Birinchidan, Mata mavsum davomida 13 ta golli uzatmani amalga oshirgan va o‘z hisobiga 5 ta gol yozdirib qo‘ygan holda, Avstraliya chempionatining eng yaxshi assistentiga aylandi.

Biroq eng asosiy yangilik bu emas — tajribali futbolchi yakunlangan mavsumning eng yaxshi futbolchisi deb topildi.

Eslatib o‘tamiz, Xuan Mata hozirda «Melburn Viktori» jamoasi sharafini himoya qilmoqda. Bu uning Avstraliyadagi ikkinchi klubidir, chunki u bundan oldin bir muddat «Vestern Sidney» tarkibida ham to‘p surishga ulgurgan edi.